Valser per negin

da Sophie Hunger

Denter artist:as eis ei derasau ch’ins po magari buca star ora aut:ras artist:as. Ins ei schalus:a ni queta ei semplamein lungurus tgei che tschel:las fan. Il bia ha ei da far cun quei ch’ins ha buca peda da propi sefatschentar cun la persuna davos igl art ni ch’ei fa il triggern enzatgei en ins. Quei schabegia era a mi da temps en temps. Mo jeu hai empriu da buca dar memia bia pussonza alla caussa e schar ei in tec dalla vart, entochen ch’jeu hai temps da propi sefatschentar cun la materia e la persuna.

Ina da quellas artist:as ch’jeu hai mai propi saviu tschaffar entochen uss ei Sophie Hunger. Gia da miu temps da studi a Turitg era ella presenta per mei, zanua ella periferia, glieud che discurreva da sia musica e da ses texts. Jeu sai che Alessandro era in da quels fans. El sez era Turitges, mo jeu havevel buca propi in link cun quella cultura da «singer-songwriter», e per mei era ella in tec memia brava dalla pareta. Jeu erel plitost Lana Del Rey, e sun forsa aunc adina in tec. Mo enzaco leva Sophie Hunger tuttina vegnir en mia veta. Ed ella ei vegnida digl esch davos en. In artist ch’jeu quitavel adina buns era Faber. Per dir cheu denter nus: Igl ei adina pli sempel da sefatschentar cun umens che fan art, perquei ch’els ein pli lunsch naven da mia realitad feminina.

Sophie Hunger, Faber e Dino Brandão han lu fatg in album ensemen cun il num «Ich liebe Dich». Igl ei in album cun canzuns en lungatg tudestg svizzer che tractan dall’amur. In album che jeu hai tedlau ensi ed engiu. Igl algoritem da miu Spotify ha lu zacu proponiu la canzun da Sophie Hunger «Walzer für Niemand». Forsa perquei che jeu stun ell’Engiadina e laschel encrescher magari per il marcau tudestg. Forsa era perquei ch’jeu fetsch il daten in um dalla Svizra tudestga e perquei che jeu less far pasch cun il lungatg tudestg e miu temps a Turitg. E lu ei quei cudisch che Sophie Hunger ha scret cun il medem tetel e cun las bialas colurs dil cover curdaus a mi els mauns. «Walzer für Niemand» ei vegnius publicaus il mars d’uonn. Ina historia fictiva, sco l’autura scriva all’entschatta dil cudisch. Ei setracta da duas persunas che creschan si cun geniturs che lavuran tier l’Armada svizra. In’affonza en bia tiaras e bia munds – e cun bia midadas. La historia pren il:la lectur:a tier ils dus affons, atras lur giuventetgna ed en lur mund particular. Duas persunas che san buca sesparter, che setegnan ensemen perquei ch’ei dat schiglioc negin plauntschiu da setener. Ina dallas duas figuras damogna la ruptura e daventa ina musicista cun success internaziunal, l’autra va a piarder zanua sin via. Igl ei bi da crescher si cun ils dus protagonists, ins sesenta fetg involvaus en lur spazi, era sche la fin ei radicala. Viver e murir ed ina biala perspectiva sin las pintgas caussas da nossa veta. Ina historia sco ella savess schabegiar dapertut sil mund. Cun bials detagls e curiositads, bia musica e lingias poeticas: «Wir beobachten unsere Liebsten beim Schlaf und ahnen, dass wir nichts wissen voneinander.» La historia vegn accumpignada da detgas dallas Gualseras, danunder che la schlatteina Hunger deriva. Aschuntau ha Sophie Hunger in pèr skizzas malegiadas che regordan vid las nanas da Niki de Saint Phalle.

Jeu sun leda che jeu hai giu il temps e la curascha da sefatschentar cun in’artista per mei aunc nunenconuschenta. Bugen fuss jeu in tec pli fetg aunc sco ella, far fina musica e scriver in cudisch cun mias skizzas ni fotografias. Jeu selegrel perquei sin il concert el december da Sophie Hunger, Faber e Dino Brandão el Kaufleuten a Turitg.